Khuda bohat hai......( Ghayel )

by Sajid_Ghayel on April 23, 2010, 06:30:21 AM

Pages: 1 [2] All

Author

(Read 3465 times)

Janaab Sajid sahib, aapne mere comment ka reply diya, bahot shukriya, lekin aapne tasallibakhsh jawab nahi diya. Meri aapse koi dushmani nahi hai lekin baat bahot ajeeb si aur bilkul hatkar lagi isliye comment kiya tha.

Maine ye janna chaha that ke pahele sher ke aakhir mein ‘hai’ aayega ya ‘hain’ aayega. Aapne is baat ka to jawab nahi diya lekin aapki deegar baton se zahir hua ke yahan ‘hain’ aayega.

“Basti me gunah_garo ki, Masjide bohat hai” is line mein aapne gunah-garo lafz ghalat istemaal kiya hai. Kya aap kisi aisi basti ka naam bata sakte jo gunahgaron ki basti kahlati ho aur wahan masjiden bahot hon. Is line ka matlab ye bhi nikalta hai ke mubayyna gunahgaro ki basti mein masjiden zyada hoti hain baqi jagah kam. Asl baat ye hai gunaahgar aur nek-kaar har jagah hote hain aur masjiden kahin kam kahi zyada hoti hain. Iska gunahgaro ke hone na hone se koi talluq nahi hai.

Maine aap par koi tohmat nahi lagai, aap phir se mera comment padhen. Apko ya kisi ko bhi kafir kahne ki main himaqat nahi kar sakta verna main khud khatre mein pad jaaunga. Aapne us sher mein ek se zyada Khuda ki baat kahi hai isliye ye ek kufriya sher kahlayega. Aapne is misre ki tashreeh me ye likha hai

“hum bina jhijhak gunah par gunah kiye jate hai aur hum aisa isiliye karte hai qke humne apni nafs ko apni khwaishi ko apna khuda bana liya hai aur wahi karte hai jo hamari nafs humse karwati hai.......”,

Ye sahi hai hai ke hum apni khwahisho ke peechhey bhaagte rahte hain aur inke chakkar mein khuda ke ahkaam todkar gunah bhi karte hain lekin in khwahishon ko apna khuda koi nahi kahta varna phir wahi kufr ya shirk wali baat ho jayege. Waise aap apne aitraf ke kisi Aalim ko ye sher dikha lein to wo behtar wazahat kar denge.

Allama Iqbal ka jo sher aapne quote kiya hai wo aapke sher se bilkul alag hai isliye aapne sahi misaal nahi di. Is sher mein musalmano ki deeni haalat ka zikr kiya gaya hai ke wo masjid to bahot jald bana lete hain lekin usme namaaz nahi padhte. Aapke sher mein kai khudaon ki baat kahi gai hai jabke Allama Iqbal ke sher mein Imaan walon yani ek khuda ke manne walon ki baat kahi gai hai.

Maikashi na karne walo ke bare mein aapka jo sher hai us par aapne kuch nahi bataaya. Agar iska matlab pecheeda bhi ho to koi baat nahi, aap batayen to sahi. Maloom to chale ke wo kaun si soorat hai ke jab sharaab jaise haraam cheez ko na peene wale behuda kahlate hain.

Shero-shayari ke bare mein Islami nazriye kya hai agar aap hi bata dete to zyada achha hota kyonke aap bhi shayari karte hain aur behtar tariqe se bata sakte hain. Aur dusre bahot se Yoindians jo shayari karte hain unko bhi maloom ho jaaye.

Aapne is creaton mein qafiye bhi sahi istemaal nahi kiye hain aur na hi ye behr mein hai.

Shukriya, Khuda Hafiz.

Quote from: Sajid_Ghayel on April 28, 2010, 02:30:39 PM

Riyaz aur Shihab saheb agar aap dono ke alawa koi aur mujhe yeh baat kehta to shayed mujhe itna Tajjub nahi hota. Khair aap dono ke jazbato ki main Kadr karta hu. Main is baat se nahi darta ke aapne mere sher ko kufriyaa.N sher kaha ya mujh par kafir hone ki tohmat lagayee. Aap samaieen hai aapka poora haq hai ke aap apni ray zahir kare.

Mujhe Afsos is baat ka hai ke aapne sher ko samjha hi nahi.........aisa kisi ke sath bhi ho sakta hai.....

Kisi zamane me Allama Saheb ne bhi ek sher kaha tha.........

Masjid to banaiee shab bhar me Imaa.N ki hararat walo ne

Dil apna purana papi tha barso me namazi ban na sake....

Agar aapki naraazgi ko sahi manu to yeh sher bhi kufriyaa.N hua......khair main apne sher ki taraf aata hu

Basti me gunahgaro ki masjide bohat hai.........

Is misre me maine yeh kehna chaha hai ke logh Masjide to banwa lete hai par unhe aabad nahi karte, aur gunaho ke rasto se muh nahi modte. Subah 5 waqt muazzin masjid ki taraf muslmano ko bulata hai lekin koi dhiyaan nahi deta.....aur yaha sirf baat musalmano ki ya masjid ki nahi hai. Yeh baat har shaks par lagu hoti hai jo khudko kisi mazhab ka anuyaiee to batlata hai par apne mazheb ke bataye huye rasto par nahi chalta.......Yeh misra aise tamam logho ke liye bohat bada tanz tha......

Khauf_e_khuda nahi magar khuda bohat hai.....

Is misre me maine yeh bayaa.N kiya hai ke yeh sabse badi haqeeqat hai ke Allah ya Bhagwan har waqt humko dekh raha hai sun raha phir bhi hum bina jhijhak gunah par gunah kiye jate hai aur hum aisa isiliye karte hai qke humne apni nafs ko apni khwaishi ko apna khuda bana liya hai aur wahi karte hai jo hamari nafs humse karwati hai.......

Jaha tak dusre sher ki baat hai to mera khyaal yeh hai ke jab matla itna saaf aur wazeh hone ke bavjood use kufriyaa.N sher kaha gaya to dusra to bohat pecheeda hai use samajhne wale aur hi hain....

Jaha tak Islami Nazriyaa.N hai shero_shayri ka to aap sab khud jante hoge ke hamare Pyaare Nabi ka kya farmaan hai Shayri ke mutallik. Main yeh baat yaha kehna nahi chahta agar aap ko nahi pata to net par har jankari maujoood hai aur mujhe yaqeen hai aapke aitraaf me Aalim bhi hoge jo aapko khulkar samjha dege.

Agar mera yeh samjhana bhi kaam nahi aaya ho to main Mafi chahta hu un sab se jinka dil meri shayri ne dukhaya hai aur monitors se guzarish karta hu ke woh is thread ko Block kar de....ya delete kar de.

Ghayel

Jump to:

Quick Reply

With a Quick-Reply you can use bulletin board code and smileys as you would in a normal post, but much more conveniently.